Book 1 • Chapter 211
Section 211
16 verses
Verse 1
परसत पद पावन सोक नसावन प्रगट भई तपपुंज सही
Verse 2
देखत रघुनायक जन सुख दायक सनमुख होइ कर जोरि रही
Verse 3
अति प्रेम अधीरा पुलक सरीरा मुख नहिं आवइ बचन कही
Verse 4
अतिसय बड़भागी चरनन्हि लागी जुगल नयन जलधार बही
Verse 5
धीरजु मन कीन्हा प्रभु कहुँ चीन्हा रघुपति कृपाँ भगति पाई
Verse 6
अति निर्मल बानीं अस्तुति ठानी ग्यानगम्य जय रघुराई
Verse 7
मै नारि अपावन प्रभु जग पावन रावन रिपु जन सुखदाई
Verse 8
राजीव बिलोचन भव भय मोचन पाहि पाहि सरनहिं आई
Verse 9
मुनि श्राप जो दीन्हा अति भल कीन्हा परम अनुग्रह मैं माना
Verse 10
देखेउँ भरि लोचन हरि भवमोचन इहइ लाभ संकर जाना
Verse 11
बिनती प्रभु मोरी मैं मति भोरी नाथ न मागउँ बर आना
Verse 12
पद कमल परागा रस अनुरागा मम मन मधुप करै पाना
Verse 13
जेहिं पद सुरसरिता परम पुनीता प्रगट भई सिव सीस धरी
Verse 14
सोइ पद पंकज जेहि पूजत अज मम सिर धरेउ कृपाल हरी
Verse 15
एहि भाँति सिधारी गौतम नारी बार बार हरि चरन परी
Verse 16
जो अति मन भावा सो बरु पावा गै पतिलोक अनंद भरी
0:000:00
Speed: