Book 4 • Chapter 7
Section 7
31 verses
Verse 1
जे न मित्र दुख होहिं दुखारी तिन्हहि बिलोकत पातक भारी
Verse 2
निज दुख गिरि सम रज करि जाना मित्रक दुख रज मेरु समाना
Verse 3
जिन्ह कें असि मति सहज न आई ते सठ कत हठि करत मिताई
Verse 4
कुपथ निवारि सुपंथ चलावा गुन प्रगटे अवगुनन्हि दुरावा
Verse 5
देत लेत मन संक न धरई बल अनुमान सदा हित करई
Verse 6
बिपति काल कर सतगुन नेहा श्रुति कह संत मित्र गुन एहा
Verse 7
आगें कह मृदु बचन बनाई पाछें अनहित मन कुटिलाई
Verse 8
जा कर चित अहि गति सम भाई अस कुमित्र परिहरेहि भलाई
Verse 9
सेवक सठ नृप कृपन कुनारी कपटी मित्र सूल सम चारी
Verse 10
सखा सोच त्यागहु बल मोरें सब बिधि घटब काज मैं तोरें
Verse 11
कह सुग्रीव सुनहु रघुबीरा बालि महाबल अति रनधीरा
Verse 12
दुंदुभी अस्थि ताल देखराए बिनु प्रयास रघुनाथ ढहाए
Verse 13
देखि अमित बल बाढ़ी प्रीती बालि बधब इन्ह भइ परतीती
Verse 14
बार बार नावइ पद सीसा प्रभुहि जानि मन हरष कपीसा
Verse 15
उपजा ग्यान बचन तब बोला नाथ कृपाँ मन भयउ अलोला
Verse 16
सुख संपति परिवार बड़ाई सब परिहरि करिहउँ सेवकाई
Verse 17
ए सब रामभगति के बाधक कहहिं संत तब पद अवराधक
Verse 18
सत्रु मित्र सुख दुख जग माहीं माया कृत परमारथ नाहीं
Verse 19
बालि परम हित जासु प्रसादा मिलेहु राम तुम्ह समन बिषादा
Verse 20
सपनें जेहि सन होइ लराई जागें समुझत मन सकुचाई
Verse 21
अब प्रभु कृपा करहु एहि भाँती सब तजि भजनु करौं दिन राती
Verse 22
सुनि बिराग संजुत कपि बानी बोले बिहँसि रामु धनुपानी
Verse 23
जो कछु कहेहु सत्य सब सोई सखा बचन मम मृषा न होई
Verse 24
नट मरकट इव सबहि नचावत रामु खगेस बेद अस गावत
Verse 25
लै सुग्रीव संग रघुनाथा चले चाप सायक गहि हाथा
Verse 26
तब रघुपति सुग्रीव पठावा गर्जेसि जाइ निकट बल पावा
Verse 27
सुनत बालि क्रोधातुर धावा गहि कर चरन नारि समुझावा
Verse 28
सुनु पति जिन्हहि मिलेउ सुग्रीवा ते द्वौ बंधु तेज बल सींवा
Verse 29
कोसलेस सुत लछिमन रामा कालहु जीति सकहिं संग्रामा
Verse 30
कह बालि सुनु भीरु प्रिय समदरसी रघुनाथ
Verse 31
जौं कदाचि मोहि मारहिं तौ पुनि होउँ सनाथ
0:000:00
Speed: