Book 6 • Chapter 61
Section 61
20 verses
Verse 1
उहाँ राम लछिमनहिं निहारी बोले बचन मनुज अनुसारी
Verse 2
अर्ध राति गइ कपि नहिं आयउ राम उठाइ अनुज उर लायउ
Verse 3
सकहु न दुखित देखि मोहि काऊ बंधु सदा तव मृदुल सुभाऊ
Verse 4
मम हित लागि तजेहु पितु माता सहेहु बिपिन हिम आतप बाता
Verse 5
सो अनुराग कहाँ अब भाई उठहु न सुनि मम बच बिकलाई
Verse 6
जौं जनतेउँ बन बंधु बिछोहू पिता बचन मनतेउँ नहिं ओहू
Verse 7
सुत बित नारि भवन परिवारा होहिं जाहिं जग बारहिं बारा
Verse 8
अस बिचारि जियँ जागहु ताता मिलइ न जगत सहोदर भ्राता
Verse 9
जथा पंख बिनु खग अति दीना मनि बिनु फनि करिबर कर हीना
Verse 10
अस मम जिवन बंधु बिनु तोही जौं जड़ दैव जिआवै मोही
Verse 11
जैहउँ अवध कवन मुहु लाई नारि हेतु प्रिय भाइ गँवाई
Verse 12
बरु अपजस सहतेउँ जग माहीं नारि हानि बिसेष छति नाहीं
Verse 13
अब अपलोकु सोकु सुत तोरा सहिहि निठुर कठोर उर मोरा
Verse 14
निज जननी के एक कुमारा तात तासु तुम्ह प्रान अधारा
Verse 15
सौंपेसि मोहि तुम्हहि गहि पानी सब बिधि सुखद परम हित जानी
Verse 16
उतरु काह दैहउँ तेहि जाई उठि किन मोहि सिखावहु भाई
Verse 17
बहु बिधि सिचत सोच बिमोचन स्त्रवत सलिल राजिव दल लोचन
Verse 18
उमा एक अखंड रघुराई नर गति भगत कृपाल देखाई
Verse 19
प्रभु प्रलाप सुनि कान बिकल भए बानर निकर
Verse 20
आइ गयउ हनुमान जिमि करुना महँ बीर रस
0:000:00
Speed: