Book 7 • Chapter 118
Section 118
16 verses
Verse 1
सोहमस्मि इति बृत्ति अखंडा दीप सिखा सोइ परम प्रचंडा
Verse 2
आतम अनुभव सुख सुप्रकासा तब भव मूल भेद भ्रम नासा
Verse 3
प्रबल अबिद्या कर परिवारा मोह आदि तम मिटइ अपारा
Verse 4
तब सोइ बुद्धि पाइ उँजिआरा उर गृहँ बैठि ग्रंथि निरुआरा
Verse 5
छोरन ग्रंथि पाव जौं सोई तब यह जीव कृतारथ होई
Verse 6
छोरत ग्रंथि जानि खगराया बिघ्न अनेक करइ तब माया
Verse 7
रिद्धि सिद्धि प्रेरइ बहु भाई बुद्धहि लोभ दिखावहिं आई
Verse 8
कल बल छल करि जाहिं समीपा अंचल बात बुझावहिं दीपा
Verse 9
होइ बुद्धि जौं परम सयानी तिन्ह तन चितव न अनहित जानी
Verse 10
जौं तेहि बिघ्न बुद्धि नहिं बाधी तौ बहोरि सुर करहिं उपाधी
Verse 11
इंद्रीं द्वार झरोखा नाना तहँ तहँ सुर बैठे करि थाना
Verse 12
आवत देखहिं बिषय बयारी ते हठि देही कपाट उघारी
Verse 13
जब सो प्रभंजन उर गृहँ जाई तबहिं दीप बिग्यान बुझाई
Verse 14
ग्रंथि न छूटि मिटा सो प्रकासा बुद्धि बिकल भइ बिषय बतासा
Verse 15
इंद्रिन्ह सुरन्ह न ग्यान सोहाई बिषय भोग पर प्रीति सदाई
Verse 16
बिषय समीर बुद्धि कृत भोरी तेहि बिधि दीप को बार बहोरी
0:000:00
Speed: