Book 1 • Chapter 31
Sarga 31
24 verses
Verse 1
अथ तां रजनीं तत्र कृतार्थौ रामलक्ष्मणौ ऊषतुर्मुदितौ वीरौ प्रहृष्टेनान्तरात्मना
Verse 2
प्रभातायां तु शर्वर्यां कृतपौर्वाह्णिकक्रियौ विश्वामित्रमृषींश्चान्यान् सहितावभिजग्मतु:
Verse 3
अभिवाद्य मुनिश्रेष्ठं ज्वलन्तमिव पावकम् ऊचतुर्मधुरोदारं वाक्यं मधुरभाषिणौ
Verse 4
इमौ स्म मुनिशार्दूल किङ्करौ समुपस्थितौ आज्ञापय यथेष्टं वै शासनं करवाव किम्
Verse 5
एवमुक्ता स्ततस्ताभ्यां सर्व एव महर्षय: विश्वामित्रं पुरस्कृत्य रामं वचनमब्रुवन्
Verse 6
मैथिलस्य नरश्रेष्ठ जनकस्य भविष्यति यज्ञ: परमधर्मिष्ठस्तस्य यास्यामहे वयम्
Verse 7
त्वं चैव नरशार्दूल सहास्माभिर्गमिष्यसि अद्भुतं धनुरत्नं च तत्र तद्रष्टुमर्हसि
Verse 8
तद्धि पूर्वं नरश्रेष्ठ दत्तं सदसि दैवतै: अप्रमेयबलं घोरं मखे परमभास्वरम्
Verse 9
नास्य देवा न गन्धर्वा नासुरा न च राक्षसा: कर्तुमारोपणं शक्ता न कथञ्चन मानुषा:
Verse 10
धनुषस्तस्य वीर्यं तु जिज्ञासन्तो महीक्षित: न शेकुरारोपयितुं राजपुत्रा महाबला:
Verse 11
तद्धनुर्नरशार्दूल मैथिलस्य महात्मन: तत्र द्रक्ष्यसि काकुत्स्थ यज्ञं चाद्भुतदर्शनम्
Verse 12
तद्धि यज्ञफलं तेन मैथिलेनोत्तमं धनु: याचितं नरशार्दूल सुनाभं सर्वदैवतै:
Verse 13
आयागभूतं नृपतेस्तस्य वेश्मनि राघव अर्चितं विविधैर्गन्धैर्धूपैश्चागरुगन्धिभि:
Verse 14
एवमुक्त्वा मुनिवर: प्रस्थानमकरोत्तदा सर्षिसङ्घ स्सकाकुत्स्थ: आमन्त्र्य वनदेवता:
Verse 15
स्वस्ति वोऽस्तु गमिष्यामि सिद्वस्सिद्धाश्रमादहम् उत्तरे जाह्नवीतीरे हिमवन्तं शिलोच्चयम्
Verse 16
प्रदक्षिणं तत: कृत्वा सिद्धाश्रममनुत्तमम् उत्तरां दिशमुद्दिश्य प्रस्थातुमुपचक्रमे
Verse 17
तं प्रयान्तं मुनिवरमन्वयादनुसारिणम् शकटीशतमात्रं तु प्रायेण ब्रह्मवादिनाम्
Verse 18
मृगपक्षिगणाश्चैव सिद्धाश्रमनिवासिन: अनुजग्मुर्महात्मानं विश्वामित्रं महामुनिम् निवर्तयामास तत: पक्षिसङ्घान् मृगानपि
Verse 19
ते गत्वा दूरमध्वानं लम्बमाने दिवाकरे वासं चक्रुर्मुनिगणाः शोणाकूले समाहिता:
Verse 20
तेऽस्तं गते दिनकरे स्नात्वा हुतहुताशना: विश्वामित्रं पुरस्कृत्य निषेदुरमितौजस:
Verse 21
रामोऽपि सहसौमित्रिर्मुनीं स्तानभिपूज्य च अग्रतो निषसादाथ विश्वामित्रस्य धीमत:
Verse 22
अथ रामो महातेजाः विश्वामित्रं महामुनिम् पप्रच्छ नरशार्दूल: कौतूहलसमन्वित:
Verse 23
भगवन् कोऽन्वयं देशस्समृद्धवनशोभित: श्रोतुमिच्छामि भद्रं ते वक्तुमर्हसि तत्त्वत:
Verse 24
चोदितो रामवाक्येन कथयामास सुव्रत: तस्य देशस्य निखिलमृषिमध्ये महातपा:
0:000:00
Speed: