Book 1 • Chapter 53
Sarga 53
25 verses
Verse 1
एवमुक्ता वसिष्ठेन शबला शत्रुसूदन विदधे कामधुक्कामान्यस्य यस्य यथेप्सितम्
Verse 2
इक्षून्मधूं स्तथा लाजान्मैरेयांश्च वरासनान् पानानि च महार्हाणि भक्ष्यांश्चोच्चावचां स्तथा
Verse 3
उष्णाढ्यस्योदनस्यात्र राशय: पर्वतोपमा: मृष्टान्नानि च सूपाश्च दधिकुल्यास्तथैव च नानास्वादुरसानां च षाडबानां तथैव च भाजनानि सुपूर्णानि गौडानि च सहस्रश:
Verse 4
उष्णाढ्यस्योदनस्यात्र राशय: पर्वतोपमा: मृष्टान्नानि च सूपाश्च दधिकुल्यास्तथैव च नानास्वादुरसानां च षाडबानां तथैव च भाजनानि सुपूर्णानि गौडानि च सहस्रश:
Verse 5
सर्वमासीत्सुसन्तुष्ठं हृष्टपुष्टजनायुतम् विश्वामित्रबलं राम वसिष्ठेनाभितर्पितम्
Verse 6
विश्वामित्रोऽपि राजर्षिर्हृष्ट: पुष्टस्तदाभवत् सान्त:पुरवरो राजा सब्राह्मणपुरोहित:
Verse 7
सामात्यो मन्त्रिसहितस्सभृत्य: पूजितस्तदा युक्त: परमहर्षेण वसिष्ठमिदमब्रवीत्
Verse 8
पूजितोऽहं त्वया ब्रह्मन् पूजार्हेण सुसत्कृत: श्रूयतामभिधास्यामि वाक्यं वाक्यविशारद
Verse 9
गवां शतसहस्रेण दीयतां शबला मम रत्नं हि भगवन्नेतद्रत्नहारी च प्रार्थिव: तस्मान्मे शबलां देहि ममैषा धर्मतो द्विज
Verse 10
एवमुक्तस्तु भगवान्वसिष्ठो मुनिसत्तम: विश्वामित्रेण धर्मात्मा प्रत्युवाच महीपतिम्
Verse 11
नाहं शतसहस्रेण नापि कोटिशतैर्गवाम् राजन् दास्यामि शबलां राशिभी रजतस्य च
Verse 12
न परित्यागमर्हेयं मत्सकाशादरिन्दम शाश्वती शबला मह्यं कीर्तिरात्मवतो यथा
Verse 13
अस्यां हव्यं च कव्यं च प्राणयात्रा तथैव च आयत्तमग्निहोत्रं च बलिर्होमस्तथैव च
Verse 14
स्वाहाकारवषट्कारौ विद्याश्च विविधा स्तथा आयत्तमत्र राजर्षे सर्वमेतन्न संशय:
Verse 15
सर्वस्वमेतत्सत्येन मम तुष्टिकरी सदा कारणैर्बहुभी राजन्न दास्ये शबलां तव
Verse 16
वसिष्ठेनैवमुक्तस्तु विश्वामित्रोऽब्रवीत्तत: संरब्धतरमत्यर्थं वाक्यं वाक्यविशारद:
Verse 17
हैरण्यकक्ष्याग्रैवेयान् सुवर्णाङ्कुशभूषितान् ददामि कुञ्जरांस्तेषां सहस्राणि चतुर्दश
Verse 18
हैरण्यानां रथानां च श्वेताश्वानां चतुर्युजाम् ददामि ते शतान्यष्टौ किङ्किणीकविभूषितान्
Verse 19
हयानां देशजातानां कुलजानां महौजसाम् सहस्रमेकं दश च ददामि तव सुव्रत
Verse 20
नानावर्णविभक्तानां वयस्स्थानां तथैव च ददाम्येकां गवां कोटिं शबला दीयतां मम
Verse 21
यावदिच्छसि रत्नं वा हिरण्यं वा द्विजोत्तम तावद्ददामि तत्सर्वं शबला दीयतां मम
Verse 22
एवमुक्तस्तु भगवान् विश्वामित्रेण धीमता न दास्यामीति शबलां प्राह राजन् कथञ्चन
Verse 23
एतदेव हि मे रत्नमेतदेव हि मे धनम् एतदेव हि सर्वस्वमेतदेव हि जीवितम्
Verse 24
दर्शश्च पूर्णमासश्च यज्ञाश्चैवाप्तदक्षिणा: एतदेव हि मे राजन् विविधाश्च क्रियास्तथा
Verse 25
अदोमूला: क्रियास्सर्वा मम राजन्न संशय: बहुना किं प्रलापेन न दास्ये कामदोहिनीम्
0:000:00
Speed: