Book 5 • Chapter 32
Sarga 32
14 verses
Verse 1
ततश्शाखान्तरे लीनं दृष्ट्वा चलितमानसा वेष्टितार्जुनवस्त्रं तं विद्युत्सङ्घातपिङ्गलम्
Verse 2
सा ददर्श कपिं तत्र प्रश्रितं प्रियवादिनम् फुल्लाशोकोत्कराभासं तप्तचामीकरेक्षणम्
Verse 3
मैथिली चिन्तयामास विस्मयं परमं गता अहो भीममिदं रूपं वानरस्य दुरासदम् दुर्निरीक्षमिति ज्ञात्वा पुनरेव मुमोह सा
Verse 4
विललाप भृशं सीता करुणं भयमोहिता रामरामेति दुःखार्ता लक्ष्मणेति च भामिनी रुरोद बहुधा सीता मन्दं मन्दस्वरा सती
Verse 5
विललाप भृशं सीता करुणं भयमोहिता रामरामेति दुःखार्ता लक्ष्मणेति च भामिनी रुरोद बहुधा सीता मन्दं मन्दस्वरा सती
Verse 6
सा तं दृष्ट्वा हरिश्रेष्ठं विनीतवदुपस्थितम् मैथिली चिन्तयामास स्वप्नोऽयमिति भामिनी
Verse 7
सा वीक्षमाणा पृथुभुग्नवक्त्रं शाखामृगेन्द्रस्य यथोक्तकारम् ददर्श पिङ्गाधिपते रमात्यं वातात्मजं बुद्धिमतां वरिष्ठम्
Verse 8
सा तं समीक्ष्यैव भृशं विसंज्ञा गतासुकल्पेन बभूव सीता चिरेण संज्ञां प्रतिलभ्य भूयो विचिन्तयामास विशालनेत्रा
Verse 9
स्वप्ने मयाऽयं विकृतोऽद्य दृष्टश्शाखामृगश्शास्त्रगणैर्निषिद्धः स्वस्त्यस्तु रामाय स लक्ष्मणाय तथा पितुर्मे जनकस्य राज्ञः
Verse 10
स्वप्नोऽपि नायं नहि मेऽस्ति निद्रा शोकेन दुःखेन च पीडितायाः सुखं हि मे नास्ति यतोऽस्मि हीना तेनेन्दुपूर्णप्रतिमाननेन
Verse 11
रामेति रामेति सदैव बुद्ध्या विचिन्त्य वाचा ब्रुवती तमेव तस्यानुरूपां च कथां तदर्थमेवं प्रपश्यामि तथा शृणोमि
Verse 12
अहं हि तस्याद्य मनोभवेन सम्पीडिता तद्गतसर्वभावा विचिन्तयन्ती सततं तमेव तथैव पश्यामि तथा शृणोमि
Verse 13
मनोरथस्स्यादिति चिन्तयामि तथापि बुद्ध्या च वितर्कयामि किं कारणं तस्य हि नास्ति रूपं सुव्यक्तरूपश्च वदत्ययं माम्
Verse 14
नमोऽस्तु वाचस्पतये सवज्रिणे स्वयंभुवे चैव हुताशनाय च अनेन चोक्तं यदिदं ममाग्रतो वनौकसा तच्छ तथास्तु नान्यथा
0:000:00
Speed: