Book 5 • Chapter 41
Sarga 41
21 verses
Verse 1
स च वाग्भिः प्रशस्ताभिर्गमिष्यन्पूजितस्तया तस्माद्देशादपक्रम्य चिन्तयामास वानरः
Verse 2
अल्पशेषमिदं कार्यं दृष्टेयमसितेक्षणा त्रीनुपायानतिक्रम्य चतुर्थ: इह विद्यते
Verse 3
न साम रक्षस्सु गुणाय कल्पते न दानमर्थोपचितेषु युज्यते न भेदसाध्या बलदर्पिता जनाः पराक्रमस्त्वेव ममेह रोचते
Verse 4
न चास्य कार्यस्य पराक्रमादृते विनिश्चयः कश्चिदिहोपपद्यते हतप्रवीरा हि रणे हि राक्षसाः कथञ्चिदीयुर्यदिहाद्य मार्दवम्
Verse 5
कार्ये कर्मणि निर्दिष्टे यो बहून्यपि साधयेत् पूर्वकार्याविरोधेन स कार्यं कर्तुमर्हति
Verse 6
न ह्येकस्साधको हेतुस्स्वल्पस्यापीह कर्मणः यो ह्यर्थं बहुधा वेद स समर्थोऽर्थसाधने
Verse 7
इहैव तावत्कृतनिश्चयो ह्यहं यदि व्रजेयं प्लवगेश्वरालयम् परात्मसम्मर्दविशेषतत्त्ववित्ततः कृतं स्यान्मम भर्तृशासनम्
Verse 8
कथं नु खल्वद्य भवेत्सुखागतं प्रसह्य युद्धं मम राक्षसैः सह तथैव खल्वात्मबलं च सारवत्सम्मानयेन्मां च रणे दशाननः
Verse 9
ततस्समासाद्य रणे दशाननं समन्त्रिवर्गं सबलप्रयायिनम् हृदि स्थितं तस्य मतं बलं च वै सुखेन मत्त्वाऽहमितः पुनर्व्रजे
Verse 10
इदमस्य नृशंसस्य नन्दनोपममुत्तमम् वनं नेत्रमनःकान्तं नानाद्रुमलतायुतम्
Verse 11
इदं विध्वंसयिष्यामि शुष्कं वनमिवानलः अस्मिन्भग्ने ततः कोपं करिष्यति दशाननः
Verse 12
ततो महत्साश्वमहारथद्विपं बलं समादेक्ष्यति राक्षसाधिपः त्रिशूलकालायसपट्टिसायुधं ततो महद्युद्धमिदं भविष्यति
Verse 13
अहं तु तैः संयति चण्डविक्रमै स्समेत्य रक्षोभिरसह्य विक्रमः निहत्य तद्रावणचोदितं बलं सुखं गमिष्यामि कपीश्वरालयम्
Verse 14
ततो मारुतवत्कृद्धो मारुतिर्भीमविक्रमः ऊरुवेगेन महता द्रुमान्क्षेप्तुमथारभत्
Verse 15
ततस्तु हनुमान्वीरो बभञ्ज प्रमदावनम् मत्तद्विजसमाघुष्टं नानाद्रुमलतायुतम्
Verse 16
तद्वनं मथितैर्वृक्षैर्भिन्नैश्च सलिलाशयैः चूर्णितैः पर्वताग्रैश्च बभूवाप्रियदर्शनम्
Verse 17
नानाशकुन्तविरुतैः प्रभिन्नैस्सलिलाशयैः ताम्रैः किसलयैः क्लान्तै: क्लान्तद्रुमलतायुतम् न बभौ तद्वनं तत्र दावानलहतं यथा व्याकुलावरणा रेजुर्विह्वला इव ता लताः
Verse 18
नानाशकुन्तविरुतैः प्रभिन्नैस्सलिलाशयैः ताम्रैः किसलयैः क्लान्तै: क्लान्तद्रुमलतायुतम् न बभौ तद्वनं तत्र दावानलहतं यथा व्याकुलावरणा रेजुर्विह्वला इव ता लताः
Verse 19
लतागृहैश्चित्रगृहैश्च नाशितैर्महोरगैर्व्यालमृगैश्च निर्धुतैः शिलागृहैरुन्मथितैस्तथा गृहैः प्रणष्टरूपं तदभून्महद्वनम्
Verse 20
सा विह्वलाऽशोकलताप्रताना वनस्थली शोकलताप्रताना जाता दशास्यप्रमदावनस्य कपेर्बलाद्धि प्रमदावनस्य
Verse 21
स तस्य कृत्वार्थपतेर्महाकपिर्महद्व्यलीकं मनसो महात्मनः युयुत्सुरेको बहुभिर्महाबलैश्शिया ज्वलंस्तोरणमास्थितः कपिः
0:000:00
Speed: