Book 5 • Chapter 67
Sarga 67
16 verses
Verse 1
एवमुक्तस्तु हनुमान् राघवेण महात्मना सीताया भाषितं सर्वं न्यवेदयत राघवे
Verse 2
इदमुक्तवती देवी जानकी पुरुषर्षभ पूर्व वृत्तमभिज्ञानं चित्रकूटे यथातथम्
Verse 3
सुखसुप्ता त्वया सार्धं जानकी पूर्वमुत्थिता वायस स्सहसोत्पत्य विददार स्तनान्तरे
Verse 4
पर्यायेण च सुप्तस्त्वं देव्यङ्के भरताग्रज पुनश्च किल पक्षी स देव्या जनयति व्यथाम्
Verse 5
पुनः पुनरुपागम्य विददार भृशं किल ततस्त्वं बोधितस्तस्याश्शोणितेन समुक्षितः
Verse 6
वायसेन च तेनैव सततं बाध्यमानया बोधितः किल देव्या त्वं सुखसुप्तः परन्तप
Verse 7
तां तु दृष्ट्वा महाबाहो दारितां च स्तनान्तरे आशीविष इव क्रुद्धो निश्वसन्नभ्यभाषथाः
Verse 8
नखाग्रैः केन ते भीरु दारितं तु स्तनान्तरम् कः क्रीडति सरोषेण पञ्चवक्त्रेण भोगिना
Verse 9
निरीक्षमाणस्सहसा वायसं समवैक्षथाः नखै स्सरुधिरैस्तीक्ष्णैस्तामेवाभिमुखं स्थितम्
Verse 10
सुतः किल स शक्रस्य वायसः पततां वरः धरान्तरचरश्शीघ्रं पवनस्य गतौ समः
Verse 11
ततस्तस्मिन्महाबाहो कोपसंवर्तितेक्षणः वायसे त्वं कृथाः क्रूरां मतिं मतिमतां वर
Verse 12
स दर्भं संस्तराद्गृह्य ब्रह्मास्त्रेण ह्ययोजयः स दीप्त इव कालाग्निर्जज्वालाभिमुखः खगम्
Verse 13
क्षिप्तवांस्त्वं प्रदीप्तं हि दर्भं तं वायसं प्रति ततस्तु वायसं दीप्तस्स दर्भोऽनुजगाम ह
Verse 14
स पित्रा च परित्यक्तस्सुरैश्च समहर्षिभिः त्रीन् लोकान् सम्परिक्रम्य त्रातारं नाधिगच्छति
Verse 15
पुनरेवागतस्त्रस्तस्त्वत्सकाशमरिंदम स तं निपतितं भूमौ शरण्यश्शरणागतम् वधार्हमपि काकुत्स्थ कृपया पर्यपालयः
Verse 16
मोघमस्त्रं न शक्यं तु कर्तुमित्येव राघव भवांस्तस्याक्षि काकस्य हिनस्ति स्म स दक्षिणम्
0:000:00
Speed: