Book 7 • Chapter 100
Sarga 100
25 verses
Verse 1
कस्यचित्त्वथ कालस्य युधाजित्केकयो नृपः स्वगुरुं प्रेषयामास राघवाय महात्मने गार्ग्यमङ्गिरसः पुत्रं ब्रह्मर्षिममितप्रभम्
Verse 2
दश चाश्वसहस्राणि प्रीतिदानमनुत्तमम्
Verse 3
कम्बलानि च रत्नानि चित्रवस्त्रमथोत्तमम् रामाय प्रददौ राजा शुभान्याभरणानि च
Verse 4
श्रुत्वा तु राघवो धीमान्महर्षिं गार्ग्यमागतम् मातुलस्याश्वपतिनः प्रहितं तन्महाधनम्
Verse 5
प्रत्युद्गम्य च काकुत्स्थः क्रोशमात्रं सहानुजः गार्ग्यं सम्पूजयामास यथा शक्रो बृहस्पतिम्
Verse 6
तथा सम्पूज्य तमृषिं तद्धनं प्रतिगृह्य च पृष्ट्वा प्रतिपदं सर्वं कुशलं मातुलस्य च उपविष्टं महाभागं रामः प्रष्टुं प्रचक्रमे
Verse 7
किमाह मातुलो वाक्यं यदर्थं भगवानिह प्राप्तो वाक्यविदां श्रेष्ठः साक्षादिव बृहस्पतिः
Verse 8
रामस्य भाषितं श्रुत्वा महर्षिः कार्यविस्तरम् वक्तुमद्भुतसङ्काशं राघवायोपचक्रमे
Verse 9
मातुलस्ते महाबाहो वाक्यमाह नरर्षभः युधाजित्प्रीतिसंयुक्तं श्रूयतां यदि रोचते
Verse 10
अयं गन्धर्वविषयः फलमूलोपशोभितः सिन्धोरुभयतः पार्श्वे देशः परमशोभनः
Verse 11
तं च रक्षन्ति गन्धर्वाः सायुधा युद्धकोविदाः शैलूषस्य सुता वीर त्रिकोट्यो वै महाबलाः
Verse 12
तान्विनिर्जित्य काकुत्स्थ गन्धर्वनगरं शुभम् निवेशय महाबोहो स्वे पुरे सुसमाहिते
Verse 13
अन्यस्य न गतिस्तत्र देशः परमशोभनः रोचतां ते महाबाहो नाहं त्वामहितं वदे
Verse 14
तच्छ्रुत्वा राघवः प्रीतो महर्षेर्मातुलस्य च उवाच बाढमित्येव भरतं चान्ववैक्षत
Verse 15
सो ऽब्रवीद्राघवः प्रीतः साञ्जलिप्रग्रहो द्विजम् इमौ कुमारौ तं देशं ब्रह्मर्षे विचरिष्यतः
Verse 16
भरतस्यात्मजौ वीरौ तक्षः पुष्कल एव च मातुलेन सुगुप्तौ तु धर्मेण सुसमाहितौ
Verse 17
भरतं चाग्रतः कृत्वा कुमारौ सबलानुगौ निहत्य गन्धर्वसुतान्द्वे पुरे विभजिष्यतः
Verse 18
निवेश्य ते पुरवरे आत्मजौ सन्निवेश्य च आगमिष्यति मे भूयः सकाशमतिधार्मिकः
Verse 19
ब्रह्मर्षिमेवमुक्त्वा तु भरतं सबलानुगम् आज्ञापयामास तदा कुमारौ चाभ्यषेचयत्
Verse 20
नक्षत्रेण च सौम्येन पुरस्कृत्याङ्गिरस्सुतम् भरतः सह सैन्येन कुमाराभ्यां विनिर्ययौ
Verse 21
सा सेना शक्रयुक्तेव नगरान्निर्ययावथ राघवानुगता दूरं दुराधर्षा सुरैरपि
Verse 22
मांसादानि च सत्त्वानि रक्षांसि सुमहान्ति च अनुजग्मुर्हि भरतं रुधिरस्य पिपासया
Verse 23
भूतग्रामाश्च बहवो मांसभक्षाः सुदारुणाः गन्धर्वपुत्रमांसानि भोक्तुकामाः सहस्रशः
Verse 24
सिंहव्याघ्रवराहाणां खेचराणां च पक्षिणाम् बहूनि वै सहस्राणि सेनाया ययुरग्रतः
Verse 25
अध्यर्धमासमुषिता पथि सेना निरामया हृष्टपुष्टजनाकीर्णा केकयं समुपागमत्
0:000:00
Speed: