Book 7 • Chapter 50
Sarga 50
20 verses
Verse 1
दृष्ट्वा तु मैथिलीं सीतामाश्रमे सम्प्रवेशिताम् सन्तापमगमद्घोरं लक्ष्मणो दीनचेतनः
Verse 2
अब्रवीच्च महातेजाः सुमन्त्रं मन्त्रसारथिम् सीतासन्तापजं दुःखं पश्य रामस्य सारथे
Verse 3
ततो दुःखतरं किं नु राघवस्य भविष्यति पत्नीं शुद्धसमाचारां विसृज्य जनकात्मजाम्
Verse 4
व्यक्तं दैवादहं मन्ये राघवस्य विना भवम् वैदेह्या सारथे नित्यं दैवं हि दुरतिक्रमम्
Verse 5
यो हि देवान्सगन्धर्वानसुरान्सह राक्षसैः निहन्याद्राघवः क्रुद्धः स दैवमनुवर्तते
Verse 6
पुरा रामः पितुर्वाक्याद्दण्डके विजने वने उषित्वा नव वर्षाणि पञ्च चैव महावने
Verse 7
ततो दुःखतरं भूयः सीताया विप्रवासनम् पौराणां वचनं श्रुत्वा नृशंसं प्रतिभाति मे
Verse 8
को नु धर्माश्रयः सूत कर्मण्यस्मिन्यशोहरे मैथिलीं प्रतिसम्प्राप्तः पौरैर्हीनार्थवादिभिः
Verse 9
एता वाचो बहुविधाः श्रुत्वा लक्ष्मणभाषिताः सुमन्त्रः श्रद्धया प्राज्ञो वाक्यमेतदुवाच ह
Verse 10
न सन्तापस्त्वया कार्यः सौमित्रे मैथिलीं प्रति दृष्टमेतत्पुरा विप्रैः पितुस्ते लक्ष्मणाग्रतः
Verse 11
भविष्यति दृढं रामो दुःखप्रायो ऽपि सौख्यभाक् प्राप्स्यते च महाबाहुर्विप्रयोगं प्रियैर्ध्रुवम्
Verse 12
त्वां चैव मैथिलीं चैव शत्रुघ्नभरतावुभौ सन्त्यजिष्यति धर्मात्मा कालेन महता महान्
Verse 13
इदं त्वयि न वक्तव्यं सौमित्रे भरते ऽपि वा राज्ञा वो व्याहृतं वाक्यं दुर्वासा यदुवाच ह
Verse 14
महाजनसमीपे च मम चैव नरर्षभ ऋषिणा व्याहृतं वाक्यं वसिष्ठस्य च सन्निधौ
Verse 15
ऋषेस्तु वचनं श्रुत्वा मामाह पुरुषर्षभः सूत न क्वचिदेवं ते वक्तव्यं जनसन्निधौ
Verse 16
तस्याहं लोकपालस्य वाक्यं तत्सुसमाहितः नैव जात्वनृतं कार्यमिति मे सौम्य दर्शनम्
Verse 17
सर्वथैव न वक्तव्यं मया सौम्य तवाग्रतः यदि ते श्रवणे श्रद्धा श्रूयतां रघुनन्दन
Verse 18
यद्यप्यहं नरेन्द्रेण रहस्यं श्रावितः पुरा तथाप्युदाहरिष्यामि दैवं हि दुरतिक्रमम्
Verse 19
येनेदमीदृशं प्राप्तं दुःखं शोकसमन्वितम् न त्वया भरते वाच्यं शत्रुघ्नस्यापि सन्निधौ
Verse 20
तच्छ्रुत्वा भाषितं तस्य गम्भीरार्थपदं महत् तथ्यं ब्रूहीति सौमित्रिः सूतं वाक्यमथाब्रवीत्
0:000:00
Speed: